2017年10月13日 星期五

旁人請勿見怪!當你做父母後自然會明白!


有些事情,非要輪到你的時候,
你自然會明白,例如做人父母。

好多時旁人都覺得我這做阿媽的又煩又執著,
例如帶Bella出街跟親友約會食飯又好,
又或單純逛逛超市也好,
我都會好注重衛生,
會時常幫Bella抹手抹嘴,
奶嘴久不久會用熱水洗洗,
又好介意別人用手摸阿囡塊臉,
嚴禁親友用自己用過的筷子匙羮餵Bella,
原來這些在別人眼中會覺得我懶乾淨好執著,
好像覺得全世界都有細菌似的,
某些人會話,你要比BB習慣,
否則無哂抵抗力……其實我好想回應,
現在周圍環境的確有好多菌,
而且菌更是越來越惡,
加強BB抵抗力是要從飲食入手及打疫苗,
而不是把BB放在細菌堆中去儲免疫力,
大人都要在適當時候戴上口罩,
何況是BB?
一旦孩子病了受苦,家長會相當心痛,
你做了父母,你自然會幫孩子把關。

而且大家有沒有發覺,帶孩子出街,
每當孩子望住某些陌生人時,
我們多數都會叫孩子向人Say個Hi,
但有時會遇上某些人,
會不肖一顧報以白眼,
或者覺得我們好煩,
又以為我要向他討一句:
“你孩子很可愛”…之類的說話,
其實我想講千萬別誤會,
我只是在教育我家孩子做人的基本禮貌,
教孩子在這個社會互動,
你做了父母,你就自然會做。

又或我會經常被人投訴,
我太控制Bella的飲食。
其實由她開始加固,
各界就興致勃勃的要讓她嚐珍饈百味,
試過有親友想餵荔枝給三個月大的Bella,
又有姐姐給Bella買百力滋做零食,
不過一律被我通通禁止,
然後旁人總會覺得:
“你估我想毒你個囡咩?”
其實我想講我好明白大家只是出於愛錫,
不過BB的飲食要循序漸進,
成份又要仔細看清楚,
你做了父母,你自然會緊張孩子的飲食。

有時親友會埋怨我每次約會都例必遲到,
其實都想說聲不好意思,
我們每次都想提早出門,
但每次出門又是好被動,
有時遇上Bella午睡未醒過來,
有時又因為她要飲奶或poopoo了……
你做了人父母,
你自然明白為何老是無法準時到達。

還有,請勿見怪我們老是在大談湊仔經,
為什麼每次出街總是一袋二袋,
因為當你做了父母,你自然就會明白。

許許與小BELLA >
隨性的玩樂型媽
未生小Bella前非常慢活heahea是個自由人而家當上新手媽媽全職帶娃雖然每日只有忙與累但跟小BELLA嘻嘻哈哈過每一天看著她在歡樂中成長原來更有趣是個玩樂型媽媽從前喜歡分享美容生活入廚及旅遊樂如今更有機會寫下更多育兒誌歡迎到我地FACEBOOK專頁瀏覽更多生活趣事分享~
FB專頁www.facebook.com/huihuiplayground
聯絡我們jassmine_tea@yahoo.com.hk

~ BLOG足跡 (BEAUTY, LIFESTYLE, DINE, MOM & BABY) ~


2017年10月12日 星期四

BB食譜: 嫩雞煨麵啊!

來分享一個好好味的BB簡易食譜給大家。
最近好忙,所以有時Bella的膳食會草草了事,
急起來只把兩三種蔬菜跟一款肉煲粥blend混就算,
但Bella並非省油的燈,
只會吃幾口就完全封閉嘴唇,
我自己再嚐嚐,其實真正好難食,
所以還是比心機煮好每一餐給她好了。

今次這道BB版嫩雞煨麵,
靈感來自我家樓下的大排長龍上海麵店,
我也經常外賣一客回家做午餐,
BELLA老是嚷著要mmmmmm..
所以媽只好做個BB版給你。
嫩雞煨麵的特點是:
材料跟做法簡單,但出來效果大人都可以食。


 
首先要講講麵條。今次用了在Sogo買的彩菜三色素麵。
麵條夠幼身,三色出於紅蘿蔔,菠菜,南瓜。
建議月齡大些的BB吃,鈉成份是每束1.6g,我用了1/3束。
媽媽也可以用其他牌子的BB麵條,意粉充當。

另外準備小棠葉數條,雞柳一條。

材料洗淨後,將雞柳剁成蓉,小棠菜切好碎。

 
麵條放滾水中烚熟,由於幼身,所以用了5至6分鐘已夠。


盛起瀝乾水備用。

可按BB的咀嚼能力剪碎麵條。

燒開水,水不要太多,剛浸過材料便可。
水滾後下雞蓉,同時要不斷攪散肉蓉才不會黏在一起。
 
肉差不多八成熟再下小棠菜,中火再煮3分鐘。

把配方奶及麵粉各一匙混合,加入涼開水2安士拌勻。


慢慢加入湯中,不時再攪拌。

煮約2分鐘,粉槳變就完成,倒入備用的麵條內,即成。


吃時拌勻,Bella今餐把它吃光光,自己嚐了口,沒有加調味都好味。


< 許許與小BELLA >
隨性的玩樂型媽~
未生小Bella前非常慢活, heahea是個自由人, 而家當上新手媽媽全職帶娃, 雖然每日只有忙與累, 但跟小BELLA嘻嘻哈哈過每一天, 看著她在歡樂中成長原來更有趣, 是個玩樂型媽媽~ 從前喜歡分享美容, 生活, 入廚及旅遊樂, 如今更有機會寫下更多育兒誌,
歡迎到我地FACEBOOK專頁瀏覽更多生活趣事分享~
 
FB專頁: www.facebook.com/huihuiplayground
~ BLOG足跡 (BEAUTY, LIFESTYLE, DINE, MOM & BABY) ~











2017年10月8日 星期日

{新產品} 花王Curel Age Care抗皺系列

Curel出左新既抗皺系列,
應該無人比我對此更興奮,
事關Curel真心好用,
每次冬天都會用光佢隻intensive cream,
而且開始轉季,月底又走去北海道,
帶住今次呢set系列去抗轉季敏感最啱。

今次這set aging care,
一樣有皇牌成份Ceramide及桉樹精華,
呢兩種成份混合後,可滲透到角質層,
你想皮膚再乾燥敏感都難,
我曾經試過係日本雪地凍傷了,
出好多粒粒又痕又紅,
最後去藥妝買左Curel既滋潤面霜,
長時間幫我補濕,兩三日就還我靚皮膚,
所以我一直都好偏心Curel既。

今次先左三樣產品,
包括moisture lotion化妝水,
Intensive cream滋潤面霜,
Moisture gel cream水凝乳霜。
佢地都被加入深層抗皺修復技術,
有效將植物性細緻成份導入肌底,
幫助減淡細紋,提升肌膚彈性。
再配合高濃度保濕配方,咁就perfect喇,
吾講吾知原來已經得到醫學臨床証實,
有效於8星期內提升肌膚彈性及細紋皺紋。

原本以為化妝水似經典系列一樣液體狀,
泵出來後原來偏啫喱質地,一推開好水潤,
吾黏笠既,感覺係好快滲透個隻,
大家記住如果吾想成個冬天都乾到爆拆,
就一定要係轉季前即現在,
超勤力幫肌底補水,吾理你敷mask又好,
搽肌底液又好,
總之係搽cream前做左打底步驟,
所以化妝水係不能少既。




今次重點想講兩隻不同質地既Cream,
我用cream速度極快,
一向都吾偷懶不吝嗇,
今次一盒40g既cream,
可能是人家一個月份量,
但我會半個月就用完。
兩隻不同質地既cream一早一晚用啱哂。

第一次試curel既gel cream水凝乳霜,
初塗上手非常討好,屬於保濕清爽型,
一推即滲透,完全不黏不笠,
個人覺得早上用來打底最好。
而intensive cream滋潤面霜,
就適合每晚最後一個步驟用,
防止水份被扯乾。






最後要補充一下Curel既產品特點:
配方溫和,專為敏感肌而設,弱酸性,
而且貼近肌膚天然PH值,
無香料,無色素,無酒精,
同時亦含已通過敏感測試的配方及防刺激配方,
所以我一直都覺得curel係入冬前既好推介。


< 許許與小BELLA >
隨性的玩樂型媽
未生小Bella前非常慢活, heahea是個自由人, 而家當上新手媽媽全職帶娃, 雖然每日只有忙與累, 但跟小BELLA嘻嘻哈哈過每一天, 看著她在歡樂中成長原來更有趣, 是個玩樂型媽媽~ 從前喜歡分享美容, 生活, 入廚及旅遊樂, 如今更有機會寫下更多育兒誌, 歡迎到我地FACEBOOK專頁瀏覽更多生活趣事分享~
FB專頁: www.facebook.com/huihuiplayground
聯絡我們: jassmine_tea@yahoo.com.hk

~ BLOG足跡 (BEAUTY, LIFESTYLE, DINE, MOM & BABY) ~


2017年10月6日 星期五

數盡購入最無謂的BB用品!


最近執拾一下Bella的衣物儲物櫃,
本來想寫一篇題目:
“用過最實用的BB用品分享”,
誰不知越翻就越發覺不對勁,
事關翻出來的都是使用率近乎零的用品,
而且oh my god似乎越翻越多,
所以即時要開個題目,
來跟大家數盡我家覺得最無謂的BB用品,
吾知大家屋企又有無呢幾樣野呢?

其實這堆物品都是購於孕期跟Bella初生時期,
都是因為第一次做人媽媽,完全無經驗,
購物慾又會被突如其來的母愛推到最癲峰,
就失去理性地買入原來無無謂謂的用品,
只要產品宣傳其功效關於:
BB健康,BB開心,BB舒服,BB安全,為BB好……然後,平又好貴都好,
為娘的都好願意去花費。
以下這堆被翻了出來的用品有點眼冤,
就算比人都得物無所用咁,
全部都是沒有跟老公商量下購入XD,
(不過同佢商量又等於咩都吾使買)
所以老公成日話我無理智今次自己都要認啦!

1.沖涼網
無謂度:⭐⭐⭐⭐⭐
Bella出世細粒,所以沖涼真係好難搞。
大盤對佢來說真的太大,每次嚇親佢之餘我自己都好驚浸親佢,所以當時就買了四邊掛起的沖涼網,唸住佢坐下去時有安全感,誰不知仲恐怖,因為好搖而且漂下漂下,仲差過直接坐在盤底,我要捉住佢但個網亦非常阻擾,用了半次放棄,最後比我找到下圖的初生BB沖涼海棉才解決沖涼安全感問題。



2. 沖涼溫度計
無謂度:⭐⭐⭐⭐⭐
也是用了幾次就無用,而且每次都是記得才會放在水中測溫,因為開完水放溫度計,再等待測出個準確溫度好慢,而且好傻,因為最實際還是用手踭試水溫,自己的感覺最好。

3. 咬咬樂
無謂度:⭐⭐⭐⭐
最初加固想比Bella食水果,見到咬咬樂好似幾好,BB自己又可以拎住,又不怕啃親,試過放橙,西瓜,蘋果。後來用了幾次我發覺非常不方便,因為每次只可放半隻手指既生果,Bella一下子已啜走果汁無興趣,所以最煩是refill既頻率非常高,要開合重放水果又洗又抹又消毒,最後直接比水果切條Bella拎住食仲方便。

4. 棉花球
無謂度:⭐⭐⭐⭐
買棉花球是因為育嬰講座中姑娘教的,可用來幫BB抹眼,但用了幾次又覺得無必要跟大棉花分開用,因為原本已經用大塊棉花幫Bella抹臉,每次都會整濕兩三塊,其實已經好夠用,所以後來就無再額外用棉花球了。

5. 防撞頭枕
無謂度:⭐⭐⭐⭐⭐
這件東西現在變成我家貓咪的枕頭了。
Bella學識扶住企起身時買,怕佢撞頭,唸住佢跌倒可以墊墊不會太危險。但原來Bella跌低多數都會patpat先落地,如果整個人跌底就會打橫訓底,一樣會從側面撞到頭,個防撞枕範圍太細根本毫無保護力,而且BB識企之後真的好快學企穩扶穩,所以用份錢買個背囊仔用還好。



6. 外帶USB充電暖奶袋
無謂度:⭐⭐⭐⭐⭐
極度劣評這個暖奶袋,中伏之冠的就是它。
之前唸住帶出街用,因為Bella食奶好慢,唸住飲奶時要座奶就放枝奶入去暖住,但原來保暖溫度仲衰過用熱水座住,加上當時正值冬天,用USB充住電要等良久才開始暖,Bella都訓著覺了。

7. BB專用潤唇膏
無謂度:⭐⭐⭐⭐
幫初生BB塗潤唇膏,你地會不會笑我!XD...
其實當初是因為見Bella出世無耐全身開始掉皮(因為浸得耐胎水原故),又正值冬天喎,醫生叫我勤力幫Bella滋潤保濕要塗潤膚膏,所以緊張的媽媽就連BB潤唇膏都買埋,但買了後又不敢幫佢塗,雖然說是BB安心用,但始終怕佢食到入口,而家變了自己用不浪費好了。

8.汗巾
無謂度:⭐⭐⭐
春天時候買既,當時仲唸住夏天Bella會好熱要幫佢不斷抹汗,所以唸住用汗巾吸汗。但夏天都就快過,我都未拎出來用過,出街前本來想攝多塊巾係佢背脊,但感覺佢會熱上加熱便停手了。加上一來無想像中熱到汗流浹背的情況出現,二來就算有汗即時用乾淨紙巾抹更方便衛生,可能D汗巾要等Bella識走識玩,玩到身水身汗才有用吧??

9. 手泵型吸鼻器
無謂度:⭐⭐⭐⭐⭐
最初寄予厚望,之後發覺十分“無料到”。
事關每次用盡力按壓,個吸引力度都好弱雞,最後改用下圖超好用既軟管式自己用口吸,才輕鬆解決Bella的鼻垢鼻涕問題。


數完我買過的無謂用品之後,大家吾好以為我買親都中伏喎,其實我都入過不少好野嫁,有機會再慢慢同大家分享。

< 許許與小BELLA >
隨性的玩樂型媽~ 未生小Bella前非常慢活, heahea是個自由人, 而家當上新手媽媽全職帶娃, 雖然每日只有忙與累, 但跟小BELLA嘻嘻哈哈過每一天, 看著她在歡樂中成長原來更有趣, 是個玩樂型媽媽~ 從前喜歡分享美容, 生活, 入廚及旅遊樂, 如今更有機會寫下更多育兒誌, 歡迎到我地FACEBOOK專頁瀏覽更多生活趣事分享~
~ BLOG足跡 (BEAUTY, LIFESTYLE, DINE, MOM & BABY) ~

2017年9月29日 星期五

當媽媽後,自然會出現的有趣舉動!


做左人媽媽之後,
除左買親都係囝囡既野,
手機吾洗講有大量佢地既相外,
仲要每張每秒表情都吾捨得洗走,
其實仲發覺自己會做出一D媽媽先會做既舉動,
吾知你地有無試過呢?!
 
1. 每次餵佢地食野,當佢地張開口時,自己通常都會情不自禁地同佢一齊張大個口,直到阿B合埋口自己先會跟住合埋,不過BB有野食,阿媽就食空氣,有時仲會幫手配埋音 “mmmm”。
 
2.曾經睇過篇文章,建議吾好成日同小B講叠字,話會影響發音學習。有時爸爸放工返黎同阿囡講“抱抱”,“玩玩”,我都會同爸爸講吾好講雙音啦。但其實轉頭自己一日裡頭真係講吾少,換片片,飲奶奶,食餅餅,沖涼涼,換衫衫,去街街……………,明明提過自己,但永遠都會重複,係咪個個媽媽對住BB都會咁嫁?!
 
3. 睡房大床靠牆,以前係我訓入面,老公訓出面,自從陀B開始,方便經常去廁所及落地,就變左訓出面,一訓訓到而家,
因為旁邊係BB床,阿囡有咩動靜,方便阿媽第一時間彈起身,而老公就應該好enjoy訓左入面,因為咩都吾使理。
 
4. 一日總有好幾次會湊個頭埋阿囡個patpat到,聞下佢有無痾臭臭,有時慣左吾記得,出到公共場所一下吾為意會照做,自己做左阿媽當然若無其事, 但如果自己係D街外人都會覺得好嘔心。
 
5. 好耐都無唱過容祖兒既歌,因為而家把口日日都用黎唱兒歌,做左人阿媽吾知點解自然會識返幾首,D發聲公仔發聲書既歌仔一定識唱,方便時不時唱比BB聽。你地首飲歌又係邊首?
 
6. 帶BB出街買野又好,搭又好,總會有途人同BB打招呼引佢玩,此時自己就要好忙咁應對,又要笑臉迎人,又要作狀叫BB向人hi同人bye,吾好意思就咁走左去,又要寒暄幾句,其實出一出街 ,不斷同路人甲乙丙丁打招呼都幾攰,遇正趕時間真係好無奈。
 
7. 以前成個雪櫃都係零食雪糕汽水之類,BB加固後,想佢食野有營養,去親買餸就會不受控地買一大堆蔬果,而家個雪櫃就填滿哂呢五顏六色既野,有時怕擺得耐就連大人都要出動執手尾,所以突然間自己飲食都變得健康埋。

 
我覺得小朋友於不同既成長階段,都會出現好多有趣既事物,之後媽媽既身心習慣都會跟住改變,好感恩我有機會做全職媽媽陪住囡囡每天成長,可以體驗箇中樂趣…各位媽媽你地都有好笑有趣既事分享嘛?


< 許許與小BELLA >
隨性的玩樂型媽~ 未生小Bella前非常慢活, heahea是個自由人, 而家當上新手媽媽全職帶娃, 雖然每日只有忙與累, 但跟小BELLA嘻嘻哈哈過每一天, 看著她在歡樂中成長原來更有趣, 是個玩樂型媽媽~ 從前喜歡分享美容, 生活, 入廚及旅遊樂, 如今更有機會寫下更多育兒誌, 歡迎到我地FACEBOOK專頁瀏覽更多生活趣事分享~

聯絡我們: jassmine_tea@yahoo.com.hk

~ BLOG足跡 (BEAUTY, LIFESTYLE, DINE, MOM & BABY) ~
TheZtyle  She.Com  BeautyExchange  OpenRice
U BABY  ESD LIFE  MyBB.Com  香港媽咪幫 BlogSpot